သွားအမြစ်တွင်းကုသမှု

• ကျွန်ုပ်တို့၏သွားကို ခေါင်းပိုင်း (Crown) နှင့် အမြစ်ပိုင်း (Root)ဟူ၍ ခွဲခြားထားပါသည်။
  
• သွားအမြစ်ပိုင်းတွင်းကုသပေးခြင်းကို ဆေးပညာဘာသာဖြင့် Root Canal Therapy (RCT) ဟုခေါ်ပါသည်။

• သွားများကိုအလွှာအားဖြင့် ကြွေသွားလွှာ (Enamel) နှင့်ဆင်စွယ်နှစ်လွှာ (Dentine) ဟုခွဲခြားထားသည်။ ဆင်စွယ်နှစ်လွှာ၏ အတွင်း၌မွသား (Pulp) ရှိပြီး မွသားအတွင်းသွေးလွှတ်ကြော၊ သွေးပြန်ကြောနှင့် အာရုံကြောများရှိသည်။
• သွားပိုးစားရောဂါဖြစ်သည့်အခါ ကြွေသွားလွှာပျက်စီးလျှင် မည်သည့်ခံစားမှုမှမဖြစ်ဘဲ၊ ဆင်စွယ်နှစ်လွှာ ရောက်သည့်အခါ သွားကျင်ခြင်းဝေဒနာခံစားရ၍ မွသားရောက်သည့်အခါ အာရုံကြော၊ သွေးကြောများ ရောင်ပြီး သွားကိုက်သည့်ဝေဒနာကို ခံစားရပါသည်။
• မွသားရောင်သည့်ရောဂါကို Pulpitis ဟုခေါ်သည်။ မွသားရောင်သည့် အခြေအနေရောက်လျှင် သာမန်သွားဖာထေး၍ ကုသမရတော့ဘဲ သွားအမြစ်အတွင်းအထိ ကုသရသည်။
• သွားအမြစ်တွင်းကုသမှုပေးရာတွင် သွား၏အတွင်းပိုင်း မွသားအထိရောက်အောင်ဖောက်၍ File ဟု ခေါ်သည့်ကိရိယာလေးများဖြင့် သွားအမြစ်တွင်းမှ မွသားအတွင်းရှိ အာရုံကြောနှင့်သွေးကြောများကို အကုန်ရှင်းလင်းအောင် ထုတ်ရသည်။ အားလုံးပြောင်စင်သွားသည့်အခါ သွားအမြစ်တွင်းမှ ဆင်စွယ် နှစ်လွှာကို ပြောင်စင်အောင်သန့်ရှင်းပြီးမှ သွားအမြစ်ထိပ်ထိရောက်အောင် Gutta Percha ဖြင့်ပိတ်လိုက်ရသည်။ Gutta Percha ဖြင့်ပိတ်သည့်အခါ လိုအပ်သည့် Sealer ကိုအသုံးပြုရပါသည်။
  
  
• သွားအမြစ်တွင်းကုသပေးရာတွင် အံဆုံးသွားမှလွဲ၍ ကျန်သည့်သွားအားလုံးကို ကုသပေးနိုင်ပါသည်။ အဘယ်ကြောင့်ဆိုသော် အံဆုံးသွားများသည် အမြစ်ပုံမှန်မရှိဘဲ အတွင်းပိုင်းသို့ရောက်လွန်းသည့် အတွက် ကုသမှုမပေးကြပါ။ သို့သော် တခါတရံ အခြေအနေပေးလျှင် အံဆုံးသွားများကိုလည်း ကုသပေး နိုင်ပါသည်။
• တခါတရံ သွားအမြစ်များက ကောက်နေသည့်အခါ Flexible Files များဖြင့်သန့်ရှင်း၍ ကုသမှုပေးနိုင် ပါသည်။ အမြစ်ထိပ်တွင်ကောက်၍ အမြစ်ထိပ်ထိရောက်အောင် ကုသမှုမပေးနိုင်သည့်အခါ အမြစ်ထိပ်ကိုဖြတ်တောက် ကုသမှု (Apicoectomy) ပြုလုပ်နိုင်သည်။ ထိုအခါ Surgical RCT ဟုခေါ်ပါသည်။
• သွားအမြစ်တွင်းကုသမှုခံယူရန် လိုအပ်သည့်အခြေအနေများမှာ-

၁။ သွားပိုးစားရောဂါကြောင့် သွား၏မွသားရောင်သည့် အခြေအနေ (Pulpitis)
၂။ သွားပိုးစားပြီး၍ သွား၏အသက်မရှိသည့်အခြေအနေ (Non-Vital)
၃။ သွားကိုထိခိုက်ဒဏ်ရာရ၍ ကြွေသား၊ ဆင်စွယ်နှစ်လွှာနှင့် မွသားပါ ထိခိုက်သည့်အခြေအနေ
၎။ တခါတရံ သွားစိုက်ရန်အတွက် ဖုံးအုပ်ရန်လိုသည့်အခါ၌ သွားမွသားနှင့် နီးကပ်နေသည့်အခါ Therapeutic RCT ပြုလုပ်ရပါသည်။

• တခါတရံ သွားအမြစ်၂ ချောင်း သို့မဟုတ် ၃ ချောင်းတွင် တစ်ချောင်းသည်ကောက်နေ၍သော်၎င်း၊ Calcified ဖြစ်၍ ပိတ်နေသည့်အခါတွင်၎င်း၊ တခြားအမြစ်များကိုကုသမှုပေး၍ ကုသမှုမပေးနိုင်သော အမြစ်ကိုဖြတ်တောက်ကုသမှု Hemi-section ပြုလုပ်ရသည်။
• ယနေ့ခေတ်စားနေသော Implant ထည့်မည့်သွား၏ ဘေးတဖက်တချောင်းစီသည် အမြစ်ထိပ်၌ ပြည်တည်နာ (Periapical Abscess) မရှိရပါ။ အကယ်၍ရှိပါက Implant Failure ဖြစ်တတ်သည်။ ထို့ကြောင့် Implant မထည့်မီဘေးသွားအမြစ်တွင်းကုသမှု ကြိုတင်ပေးထားနိုင်ပါသည်။
• သွားအမြစ်တွင်းကုသမှု မပေးနိုင်သည့်အခြေအနေများမှာ-
  

၁။ သွားဖုံးရောဂါ၊ ရေစီးကမ်းပြိုရောဂါ (Periodontitis) ကြောင့်သွားများနဲ့နေသည့် အခြေအနေ၊
၂။ ခံတွင်းသန့်ရှင်းခြင်း (Oral Hygiene) ကို သေချာစွာမပြုလုပ်နိုင်သည့် အခြေအနေ (Poor Oral Hygiene)
၃။ သွားအမြစ်တွင်းကုသပေးသည့်နောက် ပြန်လည်အစားထိုးကုသမှု (Restorative Treatment) မပြုလုပ်နိုင်သည့်အခြေအနေ၊ ဥပမာ-သွားပိုးစားသည့်အပေါက်သည် သွားဖုံး၏အောက်ရောက်နေသည့် အခြေအနေ။

• ထို့ကြောင့်မိမိတို့သွားများသည် သွားအမြစ်တွင်းကုသမှု ခံယူရန်ဖြစ်နိုင်၊ မဖြစ်နိုင်ကို နီးစပ်ရာ သွားဆရာဝန်များနှင့် ပြသ၍ မိမိတို့၏တန်ဖိုးရှိသောသွားများကို မေးရိုးတွင်း၌ထိန်းသိမ်းပြီး မိမိတို့ အသက်ထင်ရှားရှိနေသရွေ့ အသုံးချ ၀ါးစားသွားနိုင်ပါကြောင်း ဆန္ဒပြုလိုက်ရပါသည်။